ياورده إيه الغيرك

[ود الاستاذ]

ياورده إيه الغيرك
يافرحة مين البدلك
شوه نداك
عكر صفاك وكدرك
ما كنت لما تغيب عنيك
بسأل عليك وبفقدك
ضميت هواك بين الضلوع
ورحلت بيك فوق الغيوم
شايلك جواي فرحا كبير
في كل يوم
بشتاق كتير لرؤيتك
برحل بعيد
وبراي هناك بتخيلك
والكون زفاف
صفقه وهتاف
والناس تقول
الليلة جات
الليلة جات
أنا وحدي كاتلني السكات
وفترت من طول الوقاف
وآخر المطاف
لميت قواي
وآخر خطاي
ومشيت عليك
في العتمة ديك
متسرج الخوف والوهم
داخرك معاي زاد للسفر
آه ياسفر
قرب يحين
وأنا لسه
مابين بين وبين
ومشيت عليك
لكن لقيت
إنتي ماياكي الزمان
لا لهفه لا دفقة حنان
لا ريده لا حب لا وصال
وبقيتي لي
ما ياكي إنتي البعرفك
ياورده إيه الغيرك
كيف الزمن نساك زول
بهواك
بعزك
وبعشقك
ياورده مين البدلك